ᐊᖏᕐᕋᒥ ᐱᐅᓴᐅᑏᑦ

ᓇᑦᓯᐅᑉ ᕿᓯᖓ ᐊᒻᒪ ᕿᑐᒻᒪᒃᓴᕐᓯᒪᑎᓪᓗᒍ ᓄᑖᓂᒃ ᓴᓇᒍᑕᐅᕙᓕᕐᒪᑕ, ᐱᐅᔪᒻᒪᕆᐊᓗᓐᓂᒃ ᐊᖏᕐᕈᒧᑦ ᐊᒻᒪ ᓇᒻᒥᓂᕆᔭᐅᔪᓄᑦ ᐊᔾᔨᒌᖏᑦᑐᓄᑦ, ᑲᓇᑕᒥ ᐊᒻᒪ ᑲᓇᑕᐅᑉ ᐊᓯᐊᓂ. ᓇᑦᓯᐅᑉ ᕿᓯᖓ ᖃᓄᓕᒫᖅ ᐊᑐᕐᑕᐅᔪᓐᓇᕐᑐᖅ, ᓈᒻᒪᒋᔭᐅᔪᓂᒃ ᓴᓇᒍᑕᐅᓗᓂ ᐊᒻᒪ ᐊᖏᓂᕐᓴᓂᒃ ᐱᐅᓴᕈᑎᓂᒃ ᐊᒻᒪ ᐃᓪᓗᒥᐅᑕᓄᑦ.

ᑕᑯᒥᓇᒻᒪᕆᑦᑐᑦ ᑕᕐᓴᖏᑦ ᐊᔾᔨᒌᖏᑦᑐᑦ ᐊᒻᒪ ᖃᓄᐃᑦᑑᓂᒃ ᑕᕐᓴᖃᓂᖏᑦ ᕿᓯᐅᑉ ᐊᒻᒪ ᐱᐅᔪᒻᒪᕆᐅᓪᓗᑎᒃ ᐃᓪᓗᒧᑦ ᖃᓄᐃᑦᑐᑐᐃᓐᓇᒧᑦ ᐱᐅᓴᐅᑎᒋᓗᒋᑦ; ᐊᒥᐊᖃᕈᓐᓇᕐᑐᑦ ᑕᕐᓴᖃᕈᓐᓇᕐᑐᑦ ᐊᔾᔨᒌᖏᑦᑐᓂᒃ ᓇᑦᓯᐅᑉ ᕿᓯᖏᑦ – ᕿᕐᓂᕐᑕᒥᑦ ᑲᔪᕐᓄᑦ ᐊᐅᐸᕐᑐᓄᑦ ᐊᒻᒪ ᑎᐅᓪ – ᖃᓄᕐᑑᕈᑕᐅᔪᓐᓇᕐᓱᑎᓪᓗ ᓇᒻᒪᓕᕐᑎᑦᓯᓂᒃᑯᑦ ᑕᕐᓴᖏᑦ ᐱᐅᓯᑎᑦᓯᒋᐊᓪᓚᒍᓐᓇᕐᒪᑕ ᓴᓇᔭᐅᔪᓄᑦ ᐊᒻᒪ ᐃᓪᓗᒧᑦ.

ᓱᕋᑦᓴᐅᑎᒋᔪᓐᓇᖏᒻᒪᑦ ᕿᓯᐅᖓ ᓇᑦᓯᐅᑉ ᐊᑐᕆᐊᖓ ᐊᑲᐅᓈᕐᑐᒻᒪᕆᒃ ᐃᒃᓯᕙᐅᑕᓄᑦ   ᐃᓚᒋᐅᑎᓗᒍ, ᐊᒻᒪ ᑕᑯᒃᓴᐅᑦᓯᐊᕐᐸᑦᑐᑦ ᐊᓪᓚᕕᓐᓂ, ᓂᕆᕕᓐᓂ, ᐃᓪᓗᒥ ᑲᑎᖓᕕᓐᓂ, ᐊᒻᒪ ᐊᓪᓛᑦ ᐅᒥᐊᕐᓂ. ᓇᑦᓯᐅᑉ ᕿᓯᖓ ᖄᓕᐊᕆᔭᐅᔪᓐᓇᕐᑐᑦ ᐃᑦᓯᕙᐅᑕᓄᑦ, ᖁᕙᕆᐊᕈᑎᓄᑦ, ᐊᒻᒪ ᓄᓇᒃᑯᕉᑎᓂ ᑕᑯᒥᓇᕐᒪᑕ ᐊᒻᒪ ᓇᒻᒪᓈᕐᓱᑎᒃ. ᐊᑭᓯᕐᓄᑦ, ᐊᑭᓐᓇᕕᓐᓄᑦ, ᐃᓪᓕᕐᓄᓪᓗ, ᓇᑎᕐᒥᑦᑐᓴᐅᓗᑎᒃ, ᐊᓯᖏᓐᓄᑦ, ᐊᒻᒪ ᓂᕕᖓᑕᓴᔭᓕᐊᕆᓗᒋᑦ ᐊᖏᕐᕋᒥ ᐱᐅᒋᔭᐅᓗᐊᕐᐸᑦᑐᑦ ᓇᑦᓯᔭᐃᑦ ᕿᓰᑦ.

ᓂᕈᐊᕋᒃᓴᑑᖏᒻᒪᑕ ᐊᒥᐊᕐᓯᒪᓂᖏᑦ ᖃᓄᐃᑦᑐᓂᒃ ᓇᓪᓕᑳᓕᕈᕕᑦ ᕿᓯᒻᒥᒃ. ᐊᒻᒪ ᓇᑦᓯᐅᑉ ᕿᓯᖓᑕ ᖃᓄᑎᒋᖅ ᐊᕐᕌᒍᖃᒪᖔᑦ ᐃᓱᒪᒃᓴᕐᓯᐅᖃᓯᐅᑎᒋᐊᓖᒃ. “ᐃᓚᒋᓕᐅᑎᔭᐅᓗᓂ” ᕿᓯᒃ ᒥᕐᓱᕐᑕᓐᓄᑦ ᐊᑲᐅᓂᕐᓴᖅ ᐊᑐᕐᓗᓂ ᓇᑦᓯᔭᕐᒥᒃ ᒪᒃᑯᓐᓂᕐᓴᒥᒃ, ᐊᔪᒐᐃᑦᑑᖏᒻᒪᑦ, ᕿᑐᒪᓂᕐᓴᐅᒻᒪᑕ ᐊᒻᒪ ᐊᑐᐃᓐᓇᐅᓂᕐᓴᐅᓪᓗᑎᒃ. ᒥᕐᓱᕐᓯᒪᔪᓄᑦ ᐃᓚᒋᐅᑎᓗᒋᑦ ᐊᑲᐅᓈᕐᑐᑦ, ᐃᑦᓯᕙᐅᑖᓗᓐᓄᑦ ᐅᕝᕙᓘᓐᓂᑦ ᐊᑐᕐᓗᒋᑦ ᐊᓯᖏᓐᓄᑦ ᑲᒪᒋᒋᐊᑐᓂᕐᓴᐅᔪᓄᑦ.

ᐃᓐᓇᐅᓂᕐᓴᐃᑦ ᓇᑦᓯᔭᐃᑦ ᐃᔾᔪᓂᕐᓴᐅᒻᒪᑕ, ᓴᓐᖏᓂᕐᓴᐅᓪᓗᑎᒃ, ᐊᖏᓂᕐᓴᐅᓪᓗᑎᓪᓗ. ᖃᒃᓴᓕᐊᕆᓗᒋᑦ ᐊᒻᒪ ᑕᒪᒃᑯᐊ ᕿᓰᑦ ᐊᑲᐅᓈᕐᓂᕐᓴᐃᑦ ᐃᓪᓗᒥᐅᑕᓄᑦ ᐊᖏᔫᑎᓄᑦ ᐊᑐᕐᑐᒃᓴᐅᑎᓪᓗᒋᑦ ᐃᔾᔪᓂᕐᓴᐅᒻᒪᑕ. ᐃᓐᓇᐅᓂᕐᓴᐃᑦ ᓇᑦᓰᑦ ᐹᖃᑦᑕᕐᓯᒪᓂᖃᒪᑕ ᐆᒪᓂᕐᒥᓂ; ᕿᓯᖏᑦ ᕿᑦᑐᑦᓯᒪᔪᑦ ᑯᑭᖏᓐᓄᑦ. ᑕᒪᒃᑯᐊ ᕿᓯᒻᒧᑦ ᐊᑲᐅᖏᓕᐅᑕᐅᖏᑦᑐᑦ ᑭᓯᐊᓂ ᐃᒃᐱᒋᔭᐅᓯᒪᔪᑦ “ᐱᐅᖏᓐᓂᖏᑦ” – ᓲᖃᐃᒻᒪ, ᓂᕈᐊᕐᓯᒍᓐᓇᕋᕕᑦ ᐊᑲᐅᓂᕐᐸᐅᔪᕆᔭᓐᓂᒃ ᓴᓇᒍᒪᔭᓐᓄᑦ.

ᓇᑦᓯᐅᑉ ᕿᓯᖏᑦ ᑕᐃᒪᖓᓂᐊᓗᒃ ᐊᑐᕐᑕᐅᖃᑦᑕᓯᒪᔪᖅ ᑐᐱᕆᔭᐅᓪᓗᓂ, ᐊᖏᕐᕋᒥᑦᑐᒃᓴᓂᓪᓗ ᓴᓇᒍᑕᐅᓪᓗᓂ, ᐊᓯᖏᓪᓗ ᐊᒥᓱᑦ. ᐃᒫᒃ ᑐᑭᖃᖏᑦᑐᖅ ᐱᔭᕆᐊᑭᑦᑐᑯᓘᖏᑦᑐᑦ – ᐊᕐᓱᕈᕐᓇᖅᑐᑦ. ᑖᓂ ᓱᕕᐅᕆᖑ, Danny Swearinger ᐊᐅᓚᑦᓯᔪᖅ ᓚᐸᑐᐊᒥ ᐆᒥᖓ Labrador Upholstery ᕼᐊᐱ ᕙᓕ-ᑰᔅ ᐸᐃᒥ. ᐊᒥᐊᓕᑲᒥᐅᑕᕕᓂᐅᓪᓗᓂ, ᑕᑯᓚᐅᕐᓯᒪᓚᐅᔪᖏᑦᑐᖅ ᕿᓯᓐᓂᒃ ᑭᓯᐊᓂ ᓅᒃᑲᒥ ᓛᕐᐸᑐᐊᒧᑦ, ᓄᓕᐊᖓᓗ ᐊᖏᕐᕋᖅᓯᒪᓪᓗᓂ. ᐅᖃᕕᖃᒻᒪᕆᓚᐅᕐᓯᒪᔪᖅ ᐊᔭᐅᕆᓪᓗᓂ ᓴᓇᕙᑦᑐᓂᒃ ᐆᖅᑐᖁᓪᓗᒋᑦ ᓇᑦᓯᐅᑉ ᕿᓯᐊᓂᒃ ᐊᑐᕆᐊᖅ.

“ᐊᒃᓱᐊᓗᒃ ᑕᓯᒍᓐᓇᕐᑐᖅ, ᐊᒻᒪ ᐃᓛᓐᓂᒃ ᐊᓪᓛᖅ ᒥᕐᓱᕐᓱᒍ, ᐃᓚᖓ ᓯᐊᒻᒪᓲᖅ ᒥᕐᓲᑎᐅᑉ ᓵᖓᓄᑦ,” ᔅᕕᐅᕆᖑ ᐅᖃᓚᐅᕐᑐᖅ ᓯᐱᓯᒃᑯᓐᓄᑦ. “ᑕᒪᓐᓇ ᐃᓕᓴᕆᐅᓚᐅᕋᒃᑯ, ᑭᓯᐊᓂ ᐱᒡᒐᓇᖏᓕᕐᐸᓪᓕᐊᔪᖅ.”

ᔅᕕᐅᕆᖑ, Swearinger ᐅᖃᓚᐅᕐᑐᖅ ᐊᕐᓱᕈᕈᑎᒋᓗᒍ ᑲᔪᓯᒋᐊᓕᒃ ᐊᑐᕐᓂᖃᑦᓯᐊᕐᒪᑦ:: ᐱᐊᓂᒃᓯᒪᔪᑦ ᓴᓇᓯᒪᔪᑦ ᐱᐅᔪᐊᓗᐃᑦ, ᐊᒻᒪ ᐊᒃᓱᑦ ᑕᑯᔭᐅᑲᐅᕐᑐᕈᓐᓇᕐᑐᑦ ᑕᑯᒥᓇᕐᓂᖏᑦ. ᑐᒃᓯᕋᕐᑕᐅᒍᑎᓂᒃ ᑕᑕᑎᕆᕙᑦᑐᖅ ᑐᒃᓯᕋᕐᑐᓄᑦ ᐃᑯᕐᕋᓂᒃ, ᐊᓪᓚᕕᒻᒥᓗ ᐱᐅᓴᕈᑎᓂᒃ, ᐊᖏᕐᕋᒧᓪᓗ ᐃᓪᓗᒥᐅᑕᒃᓴᓂᒃ ᐊᒻᒪ ᓯᓂᑦᑕᕐᕕᒧᑦ ᐊᑭᑎᑲᓪᓚᓐᓂᒃ ᐃᒃᓯᕙᕐᕕᓂᒃ. “ᐱᐅᓱᒻᒪᕆᐊᓗᐃᑦ,” ᐅᖃᓚᐅᕐᑐᖅ ᑐᓴᒐᒃᓴᑎᒍᑦ ᓯᐱᓯᒃᑯᑎᒍᑦ. “[ᓂᐅᕕᕐᑎᒋᔭᑲ] ᐱᐅᒋᔭᒻᒪᕆᐊᓗᒐ…ᑕᑯᒥᓇᕐᑐᒻᒪᕆᐊᓗᒻᒪᑕ.”